Dy persona me origjinë nga Kosova janë arrestuar pasi dyshohet se po planifikonin të kryenin sulm terrorist me mjete shpërthyese në Itali në emër të organizatës terroriste të Shtetit Islamik (IS), raporton Gazeta Sinjali.
Sipas mediave të huaja ata janë burrë e grua, ku ndaj burrit Gjykata e Trentos ka vendosur masën e paraburgimit në arrest shtëpie me detyrimin e byzylykut elektronik.
Nga veprimet hetimore rezultoi se dy të rinjtë, të lindur në Itali nga familje me origjinë kosovare, prej kohësh kanë ndërmarrë një rrugë radikalizmi të mundësuar nga propaganda xhihadiste në internet.
Hetimet policore zbuluan se të dyshuarit mund të ishin trajnuar për të kryer akte të dhunshme dhe do të kishin planifikuar të kryenin një sulm me mjete shpërthyese në Itali.
Sipas planeve të tyre, pas kryerjes së sulmit, të dy duhej të udhëtonin në Afrikë për t’iu bashkuar organizatës terroriste.
Gjatë operacionit u kryen disa kontrolle të cilat bënë të mundur sekuestrimin e pajisjeve kompjuterike dhe produkteve kimike – për prodhimin e mjeteve shpërthyese.